[Talk-is] Nöfn jökla

[Tryggvi Björgvinsson]

Daníel Gunnarsson wrote:
> Á vef U.S. Geological Survey er að finna skýrslu sem ber heitið
> "Geographic Names of Iceland's Glaciers: Historic and Modern".
> Þessi skýrsla er afrakstur USGS, Orkustofnunar.
> 
> http://pubs.usgs.gov/pp/1746/
> 
> Skýrslan inniheldur nöfn, lýsingar og hnit allra jökla á íslandi og
> væri því nokkur fengur í að geta notað þetta efni
> 
> Þessi skýrla er public domain að einhverju marki. En í kápu bókarinnar stendur:
> "Although this report is in the public domain, permission must be
> secured from the individual copyright owners to reproduce any
> copyrighted materials contained within this report."

> Hvernig ber að skilja þessa klausu? Eru Nöfn jöklanna public domain en
> hnit ekki þar sem hnitin eru eflaust fengin af kortum gefnum út af
> Landmælingum eða er bara átt við efni sem er birt í bókinni og
> sérstaklega getið um eiganda eins og t.d. með myndir?

Mitt innlegg í þessa umræðu. Ég tek það fram að ég er ekki lögfræðingur
en hef aflað mér upplýsinga um höfundarétt, þó innlendan en ekki
bandarískan höfundarétt (þó ég þekki einnig til hans).

Til þess að verk geti talist varið með höfundarétti verður það að ná
ákveðinni verkhæð (vera nógu rosalega frumlegt þannig að engum öðrum
myndi detta það í hug). Það hefur ekki talist nægileg verkhæð að verja
nafn eða örnefni með höfundarétti. Myndir aftur á móti teljast ná
tilskilinni verkhæð og eru varðar með höfundarétti.

Það er samt hægt að fá vörn á gagnagrunn til 25 ára ef nægilega vinna og
fjármagn hefur farið í gerð gagnagrunnsins. Þannig mætti þá túlka það að
ef skýrslan getur talist gagnagrunnur (eða öllu heldur gagnasafn) að þá
getur hún verið varin. Þegar þeir segja að skýrslan sé gefin út sem
almenningseign (public domain) að þá hafa þeir með því gefið frá sér
verndina yfir sjálfu gagnasafninu (skýrslunni). Til dæmis má nefna
símaskrá. Hún nær ekki nægilegri verkhæð til þess að vera varin með
höfundarétti (hún er ekki nógu frumleg og nöfn sem foreldrar gefa
börnunum sínum eru heldur ekki höfundaréttarvarin) en sem gagnasafn
getur hún verið varin ef nægileg vinna eða fjármagn hefur verið sett í
gerð símaskráarinnar. Verndun símaskráarinnar nær þá til afritunar á
umtalsverðum hluta símaskráarinnar (meðal annars til að vernda gerð
nýrrar símaskrár) og bannar ekki fólki að skrifa niður nafn og símanúmer
einhvers úr símaskránni af því að hún er höfundaréttarvarin.

Þið eigið þá að geta notfært ykkur þær upplýsingar sem koma fram sem ná
ekki tilskilinni verkhæð eins og til dæmis nöfn jökla og hnit þeirra.
Það hefur eflaust farið vinna og fjármagn í það að finna nöfnin og
hnitin en gagnasafnið er í almenningseign.

Fyrst þeir merkja myndir sérstaklega með upprunalegum eiganda þá myndi
ég telja það líklegt að þeir séu að gefa til kynna hverjir upprunalegir
höfundar eru og við hverja eigi að tala til þess að fá leyfi fyrir
höfundaréttarvörðu efni (myndir eru jú varðar af höfundarétti).

Ég tel eftir minni bestu kunnáttu að þið getið notað jöklanöfnin og
hnitin án þess að þurfa á leyfi að halda.

Þið viljið kannski samt sem áður fullvissa ykkur um þetta (fyrst ég er
nú ekki lögfræðingur) með því að senda póst. Ef þið fáið ekki svör við
póstunum ykkar getur FSFÍ veitt ykkur frekari ráðgjöf með þetta (við
munum þá útvega ykkur lögfræðilegt álit á málinu). Áður en kallað er til
lögfræðinga er samt langbest og ódýrast bara að tala við upprunalegan
höfund og reyna að fá málið á hreint.

Vonandi hjálpar þetta.

/Tryggvi